इंग्लिस प्रिमियर लिग फुटबलमा लिभरपुल पराजित भएको छ । आज भएको खेलमा लिभरपुल ब्राइटनसँग ३–० गोल अन्तरले पराजित भएको हो । जितसँगै ब्राइटनले लिभरपुललाई तालिकामा उछिन्दै सातौं स्थानमा पुगेको छ । लिभरपुल भने आठौं स्थानमा रहेको छ । यी दुई टिमको बीचमा २ अंकको फरक रहेको छ । ब्राइटनले १८ खेलबाट ३० अंक बनाएको छ ।
ब्राइटनले घरेलु मैदानमा पहिलो हाफ भने गोलरहित बराबरी खेलेको थियो । तर, दोस्रो हाफ सुरु भए लगत्तै ब्राइटनले लय लिएको थियो । ४६ औं मिनेटमा ब्राइटनका लागि सोलमन मार्चले गोल गर्दै अग्रता दिलाएका थिए । उनैले ५३ औं मिनेटमा व्यक्तिगत दोस्रो गोल गर्दा ब्राइटनले अग्रता पनि दोब्बर बनायो । यसैगरी डेनी वेलबेकले ८१ औं मिनेटमा गोल थपेपछि ब्राइटनले लिभरपुलमाथि ३–० को शानदार जीत दर्ता गर्न सफल भयो ।
प्रिमियर लिग अन्तर्गत आज भएको अन्य खेलहरुमा उल्भसले वेस्टह्यामलाई १–० गोल अन्तरले पराजित गर्दा नटिङघम फरेस्टले लेस्टर सिटीलाई २–० को पराजय भोग्न बाध्य बनायो । यसैगरी साउथह्याम्पटनसँग इभर्टन २–१ गोल अन्तरले स्तव्ध हुँदा म्यानचेस्टर डर्बीमा युनाइटेडले २–१ को बाजी मार्न सफल भयो ।
***
इंग्लिस प्रिमियर लिग फुटबलमा म्यानचेस्टर डर्वीमा युनाइटेडले बाजी मारेको छ । आज भएको खेलमा दोस्रो स्थानको सिटीलाई पराजित गर्दै युनाइटेड तेस्रो स्थानमा उक्लिएको छ । साथै युनाइटेडले अंक तालिकामा सिटिसँगको दूरी १ मा पनि झारेको छ भने शीर्ष स्थानको आर्सनलसँग ६ अंकको दूरी कायम गरेको छ । पराजित भएको सिटीले शीर्ष स्थानको आर्सनलसँग अंकदूरी कम गर्न असफल रह्यो ।
युनाइटेडले घरेलु मैदानमा सिटीलाई २–१ गोल अन्तरले पराजित गरेको हो । पहिलो हाफ गोलरहित बराबरीमा सकिएको खेलमा सबै गोल दोस्रो हाफमा निस्किएका हुन् ।
६० औं मिनेटमा ज्याक ग्रिलिसले केभिन डी ब्रुइनको पासमा गोल गर्दै सिटीलाई अग्रता दिलाएका थिए । तर ७८ ओं मिनेटमा कासेमिरोको पासमा ब्रुनो फर्नान्डेजले गोल गरेपछि युनाइटेडले खेल १–१ को बराबरीमा ल्याएको थियो । वल्डटाफोर्डमा ८२ औं मिनेटमा मार्कस रासफोर्डले एलेजान्ड्रो फरेराको पासमा गोल गर्दै २–१ को जित पक्का गराए ।
