जर्मन बुन्डेसलिगाको दोस्रो स्थानमा रहेको बोरुसिया डर्टमुण्ड बायर लिभरकुसेनसँग पाँच दुई गोलले स्तब्ध भएको छ ।
डटमुण्डको घरेलु मैदानमा भएको खेलमा सुरुवाती दुई गोल आत्मघाती भएका थिए । खेलको १० औं मिनेटमा डर्टमुण्डका मानुयल अकान्जीको आत्मघाती गोलमा बायर लिभरकुसेनले खेलमा अग्रता बनायो ।
तर १६ औं मिनेटमा डर्टमुण्डले खेलमा बराबरी गर्न सफल भयो । बायरका फ्रेम्पोले आफ्नै पोष्टमा गोल गरे ।
खेलको २० औं मिनेटमा फ्लोरिन रिचार्डको गोलमा लिभरकुसेनले खेलमा अग्रता बनायो । त्यसको आठ मिनेटपछि लिभरकुसेनले खेल तीन एकमा पुर्यायो । उसका लागि रोबर्ट एन्डरिचले गोल गर्न सफल भए ।
पहिलो हाफमा तीन एकको अग्रता बनाएको लिभरकुसेनले ५३ औं मिनेटमा चौथो गोल गर्यो । उसका लागि जोनाथन ता ले गोल गरे ।
त्यसपछि ८७ औं मिनेटमा लिभरकुसेनले गोलको खाता पाँच एकमा पुर्यायो । उसका लागि मोउसा डिबेले गोल गरे । तर त्यसको दुई मिनेटपछि डर्टमुण्डले गोल गर्दै अन्तर कम गरेको थियो । उसका लागि स्टेफेन टिग्सले गोल गरे ।
त्यसपछि डर्टमुण्डले खेलमा फर्कन सकेन र पराजित भयो । जारी लिगमा डर्टमुण्डको यो छैटौं हार हो । यो हारपछि उसले शिर्ष स्थानको बार्यन म्युनिखसँगको दुरी कम गर्ने मौका खेर फालेको छ ।
