ए डिभिजन लिगको मिति घोषणा, १४ क्लबले खेल्ने

0 24

नेप्लेज, २ जेठ । अखिल नेपाल फुटबल संघको नयाँ कार्य समितिले ए डिभिजन लिगको मिति घोषणा गरेको छ । निर्वाचित भएको दुई सातापनि वित्न नपाउँदै नयाँ कार्यसमितिले तीन बर्ष देखि रोकिएको लिग असोज १३ गतेबाट गर्ने निर्णय गरेको हो ।

लिग असोज १३ देखि माघ १६ सम्म संचालन हुनेछ । अखिल नेपाल फुटबल संघ एन्फा अन्तर्गतको एन्फा लिग कमिटीले आज लिगको मिति घोषणा गरेको हो । राष्ट्रिय टिमका पूर्व कप्तान तथा एआईजी विज्ञानराज शर्माको अध्यक्षतामा रहेको लिग कमिटीले विभिन्न चरणमा क्लबहरुसँग छलफल गरेपछि लिगको मिति तय भएको हो ।

लिगमा १४ वटा क्लबको सहभागिता रहने पनि एन्फा लिग कमिटीले जनाएको छ । नेपालको शीर्ष डिभिजनको लिगमा थ्रीस्टार क्लब, मनाङ् मस्र्याङ्दी क्लब, सरस्वती युथ क्लब, च्यासल युथ क्लब, न्यु रोड टिम एनआरटी, ब्रिगेड ब्वइज क्लब र हिमालयन शेर्पा क्लबले सहभागिता जनाउनेछन् । यस्तै तीन विभागीय टाेलीहरू नेपाल पुलिस क्लब, नेपाल एपीएफ क्लब र त्रिभुवन अार्मी क्लब, जावलाखेल युथ क्लब, फ्रेण्ड्स क्लब, मच्छिन्द्र र संकटा क्लब पनि रहनेछन् ।

लिग कमिटीले सबै क्लबलाई बढीमा ३५ र कम्तिमा १८ खेलाडी अनुबन्धको स्वीकृति समेत प्रदान गरेको छ । सँगसँगै प्रत्यक क्लबले बढीमा चार विदेशी खेलाडी अनुबन्ध गर्न पाउने र खेलमा बढीमा तीन जनालाई मैदानमा उतार्न सकिने प्रावधान लागु गरेको छ ।

You might also like
Loading...